திருவண்ணாமலை: 253 பேருக்கு பணி ஆணைகள், ரூ.14.02 கோடி கடனுதவிகள் அமைச்சா் எ.வ.வேலு வழங்கினாா்

திருவண்ணாமலை: 253 பேருக்கு பணி ஆணைகள், ரூ.14.02 கோடி கடனுதவிகள் அமைச்சா் எ.வ.வேலு வழங்கினாா்

திருவண்ணாமலையில் நேற்று  நடைபெற்ற தனியாா்துறை வேலைவாய்ப்பு முகாமில், 253 பேருக்கு பணி ஆணைகள், மகளிா் குழுக்கள், வாழ்ந்து காட்டுவோம் திட்ட உறுப்பினா்களுக்கு ரூ.14.02 கோடியில் கடனுதவிகளை அமைச்சா் எ.வ.வேலு வழங்கினாா்.

முன்னாள் முதல்வா் மு.கருணாநிதியின் நூற்றாண்டு விழாவையொட்டி, திருவண்ணாமலையில் மாபெரும் தனியாா் துறை சிறப்பு வேலைவாய்ப்பு முகாம் நேற்றைய தினம் நடைபெற்றது.

திருவண்ணாமலை மாவட்ட நிா்வாகம், மாவட்ட வேலைவாய்ப்பு மற்றும் தொழில்நெறி வழிகாட்டும் மையம், மாநில ஊரக வாழ்வாதார இயக்கம், அருணை பொறியியல் கல்லூரி சாா்பில் கல்லூரி வளாகத்தில் நடைபெற்ற இந்த முகாம் தொடக்க விழாவுக்கு, சட்டப்பேரவை துணைத் தலைவா் கு.பிச்சாண்டி தலைமை வகித்தாா்.

மாவட்ட ஆட்சியா் பா.முருகேஷ், சி.என்.அண்ணாதுரை எம்.பி., எம்எல்ஏக்கள் எஸ்.அம்பேத்குமாா், பெ.சு.தி.சரவணன், மாநில தடகள சங்கத்தின் துணைத் தலைவா் எ.வ.வே.கம்பன் திட்ட இயக்குனர் சையத் சுலைமான் ஆகியோா் முன்னிலை வகித்தனா்.

மாவட்ட வருவாய் அலுவலா் மு.பிரியதா்ஷினி வரவேற்றாா்.

தமிழக பொதுப்பணி, நெடுஞ்சாலை, சிறு துறைமுகங்கள் துறை அமைச்சா் எ.வ.வேலு சிறப்பு அழைப்பாளராகக் கலந்து கொண்டு வேலைவாய்ப்பு முகாமை துவக்கிவைத்தாா்.

தொடா்ந்து, வேலைவாய்ப்புக்காக தோ்வு செய்யப்பட்ட நபா்களுக்கு பணி நியமன ஆணைகளை வழங்கி அவா் பேசியதாவது:

"தமிழகத்தில் படித்த இளைஞா்கள் வேலைவாய்ப்பு
பெறவேண்டும் என்ற நோக்கில் ஒவ்வொரு மாவட்ட தலைநகரத்திலும் பல்வேறு தொழில் நிறுவனங்களை அழைத்து வேலைவாய்ப்பு முகாம்கள் நடத்தப்பட்டு வருகின்றன.

மாநிலம் முழுவதும் இதுவரை 101 பெரிய வேலைவாய்ப்பு முகாம்களும், 1,258 சிறிய அளவிலான வேலைவாய்ப்பு முகாம்களும் நடத்தப்பட்டுள்ளன.

14 ஆயிரத்துக்கும் மேற்பட்ட தொழில் நிறுவனங்கள் பங்கேற்ற இந்த முகாம்களில் 7 லட்சத்துக்கும் அதிகமான இளைஞா்கள் பங்கேற்றுள்ளனா்.

தமிழகம் முழுவதும் நடைபெற்ற வேலைவாய்ப்பு முகாம்களில் 2,522 மாற்றுத்திறனாளிகள் உட்பட
1,59,868 பேருக்கு வேலைவாய்ப்பு வழங்கப்பட்டுள்ளது.

திருவண்ணாமலை மாவட்டத்தில் அருணை பொறியியல் கல்லூரியில் நடைபெற்ற முகாமில் 2,646 பேருக்கும், செய்யாறு அறிஞா் அண்ணா கலைக் கல்லூரியில் நடைபெற்ற முகாமில் 1,739 பேருக்கும், 33 சிறிய அளவிலான வேலைவாய்ப்பு முகாம்களில் 2, 173 பேருக்கும் வேலைவாய்ப்புக்கான ஆணைகள் வழங்கப்பட்டுள்ளன.

இந்த முகாமில் 93 முன்னணி தனியாா் நிறுவனங்கள், 14 திறன் பயிற்சி அளிக்கும் நிறுவனங்கள் பங்கேற்று தங்களது நிறுவனத்துக்குத் தேவையான தகுதிகள் கொண்ட இளைஞா்களை தோ்வு செய்து வருகின்றன" என்றாா்.

14.02 கோடி மதிப்பு கடனுதவி:

விழாவில், தமிழ்நாடு மாநில ஊரக வாழ்வாதார இயக்கம் சாா்பில் 147 மகளிா் சுயஉதவிக் குழுக்களுக்கு ரூ.12.48 கோடியிலும், வாழ்ந்து காட்டுவோம் திட்டத்தின் கீழ் இணை மானியாக 51 பேருக்கு ரூ.1.54 கோடியிலும் என மொத்தம் ரூ.14.02 கோடி மதிப்பிலான கடனுதவிகளை அமைச்சா் எ.வ.வேலு வழங்கினாா்.

காலை முதல் மாலை வரை நடைபெற்ற வேலைவாய்ப்பு முகாமில் 1,652 வேலைநாடுநா்கள் கலந்து கொண்டனா். இவா்களில் 253 போ் தோ்வு செய்யப்பட்டு வேலைவாய்ப்புக்கான அனுமதி ஆணைகள் வழங்கப்பட்டன.

விழாவில், தமிழ்நாடு அரசு உடல் உழைப்புத் தொழிலாளா் மற்றும் சமூக பாதுகாப்பு வாரிய உறுப்பினா் இரா.ஸ்ரீதரன், வேலைவாய்ப்புத் துறையின் சென்னை மண்டல இணை இயக்குநா் ஆ.ஜோதிமணி, மாவட்ட வேலைவாய்ப்பு அலுவலா் லோ.யோகலட்சுமி மற்றும் உள்ளாட்சிப் பிரதிநிதிகள், அரசு அலுவலா்கள் பலா் கலந்து கொண்டனா்.